បរិវត្តកម្មឌីជីថល (Digital Transformation) គឺជាដំណើរការនៃការប្រើប្រាស់ព័ត៌មាន ទំនាក់ទំនងបច្ចេកវិទ្យា សារគមនាគមន៍ និងបច្ចេកវិទ្យាឌីជីថលចុងក្រោយ ដើម្បីជួយឱ្យអាជីវកម្មកាន់តែមានភាពប្រសើរឡើងតាមរយៈ ផែនការយុទ្ធសាស្រ្ត និងការផ្លាស់ប្តូរការបង្កើនប្រាក់ចំណូល។ ទន្ទឹមនឹងការស្វះស្វែងវិវត្តខ្លួនទៅចាប់យកបរិវត្តកម្មឌីជីថល អាជីវកម្មគ្រប់ប្រភេទគួរស្វែងយល់ពីគុណសម្បត្តិ និងគុណវិបត្តិនៃដំណើរការមួយនេះឲ្យជាក់លាក់សិន។

គុណសម្បត្តិ៖

1. ជួយបង្កើនសកម្មភាពអាជីវកម្ម៖ ជំរុញនូវប្រសិទ្ធភាពនៃសេវាកម្មក្នុងការបញ្ជាទិញ និងលក់ទំនិញ ដែលបានឃើញជាក់ស្តែង តាមរយៈការរៀបចំផ្សព្វផ្សាយផលិតផលតាមប្រព័ន្ធអនឡាញ ផ្សារភ្ជាប់ទីផ្សារដល់អតិថិជនគោលដៅជាច្រើន។ លើសពីនេះពាណិជ្ជកម្មតាមប្រព័ន្ធឌីជីថលកាន់តែមានភាពងាយស្រួល ជាមួយនឹងសេវាកម្មដឹកជញ្ជូនរហ័ស និងមានតម្លៃសមរម្យ គួបផ្សំជាមួយនឹងការទូទាត់រហ័សមានប្រសិទ្ធភាព។

2. បង្កើនទីផ្សាជាសកល៖ ជួយនាំយកអាជីវកម្ម និងផលិតផលកម្ពុជាច្រើនជាងមុនទៅកាន់ទីផ្សារនៅក្នុងតំបន់ និងសកល ដែលវាក៏ជួយបង្កើនចំនួនអតិថិជនឱ្យកាន់តែច្រើនផងដែរ។ មិនត្រឹមតែប៉ុណ្ណោះ ម្ចាស់អាជីវកម្មក៏អា ចផ្សារភ្ជាប់ទំនាក់ទំនងជាមួយម្ចាស់អាជីវកម្មដទៃទៀតក្រៅតំបន់ ដែលអាចបង្កើតជាដៃគូអាជីវកម្មថ្មីៗ អាចនាំយកអ្វីដែលថ្មីមកកាន់ទីផ្សារកម្ពុជា។

3. សុវត្ថិភាព និង ប្រសិទ្ធភាព៖ ជាមួយនឹងការប្រើប្រាស់ប្រព័ន្ធឌីជីថលដែលមានប្រសិទ្ធភាព វាធ្វើឲ្យការគ្រប់គ្រងដំណើរការផលិតកម្ម ការបង្កើតទីផ្សារ ការគិតគូ និងការទុកដាក់ហិរញ្ញវត្ថុ មានភាពងាយស្រួលជាងមុន។ ហើយវាក៏អាចជួយសម្រួលដល់ការរក្សាទុកទិន្នន័យសំខាន់ៗ គណនេយ្យ និងហិរញ្ញវត្ថុជាដើមដោយកាត់បន្ថយការចំណាយ និងមានប្រសិទ្ធភាពជាងមុន។

គុណវិបត្តិ៖

1. ចំណេះដឹងអំពីប្រព័ន្ធឌីជីថលនៅមានកម្រិត៖ ដោយសារប្រទេសកម្ពុជាជាប្រទេសកំពុងអភិវឌ្ឍ និងទើបតែនៅដំណាក់កាលដំបូងនៃការធ្វើបដិវត្តឌីជីថល ទើបធ្វើឱ្យការត្រៀមខ្លួននិងបន្សាំខ្លួនទៅនឹងប្រព័ន្ធតិចណូឡូជីនៅមានកម្រិតនៅឡើយ។ ជាក់ស្ដែងមានប្រជាជនកម្ពុជាត្រឹមតែ ៣០% ប៉ុណ្ណោះដែលមានចំណេះដឹងមូលដ្ឋានលើប្រព័ន្ធឌីជីថល ដែលធ្វើឱ្យមានផលវិបាក ក្នុងការផ្លាស់ប្តូរភ្លាមៗពីអាជីវកម្មបុរាណមកប្រើប្រាស់ឌីជីថលទំនើបវិញ។

2. ឯកជនភាពអាជីវកម្ម ៖ ការបាត់បង់ឯកជនភាពតាមរយៈការផ្លាស់ប្តូរ និងដោះដូរទិន្នន័យផ្សេងៗនៅតាមប្រព័ន្ធអុីនធឺណិតនៅតែជាក្តីបារម្ភនៅឡើយ។ អាជីវកម្មខ្លះក៏មានការព្រួយបារម្ភលើឧក្រិដ្ឋកម្មតាមប្រព័ន្ធឌីជីថល (Cybercrime) ថែមទៀត ដែលអាចមានជាការក្លែងបន្លំ និងប៉ះពាល់ដល់ហិរញ្ញវត្ថុអាជីវកម្មទៀតផង។

ការតភ្ជាប់ទៅប្រព័ន្ធអុីនធឺណេត៖

ការតភ្ជាប់ទៅប្រព័ន្ធឌីជីថលរបស់ប្រជាជនកម្ពុជាក៏នៅមានកម្រិតនៅឡើយដែរ។ ប្រជាជនកម្ពុជាមិនទាន់មានសម្ថភាពប្រព័ន្ធអុីនធើណេតតនៅគ្រប់តំបន់នៅឡើយទេ ជាពិសេសតំបន់នៅតាមបណ្តាខេត្ត និងទីជនបទហើយមិនទាន់អាចប្រើប្រាស់ប្រព័ន្ធឌីជីថលបាន។

អត្ថបទនេះគំាទ្រដោយ Khmer Enterprise - សហគ្រិនខ្មែរ

សហគ្រិនខ្មែរ មានចក្ខុវិស័យក្លាយជាថ្នាលជាតិសម្រាប់ការលើកកម្ពស់គ្រប់សកម្មភាពរបស់វិស័យសហគ្រិនភាព។