កសិកម្មប្រកបដោយចីរភាព គឺជាវិធីសាស្រ្តនៃការធ្វើកសិកម្មដែលការពារធនធានធម្មជាតិ អនុវត្តដំណាំចម្រុះ ចិញ្ចឹមសត្វ កាត់បន្ថយការប្រើប្រាស់សារធាតុគីមីដែលបង្កគ្រោះថ្នាក់ និងសង្កត់ធ្ងន់លើប្រព័ន្ធអាហារក្នុងស្រុក។ គោលបំណងចម្បងគឺដើម្បីបង្កើតប្រព័ន្ធទ្រទ្រង់ខ្លួនឯងដែលផលិតអាហារដែលមានសុខភាពល្អ ខណៈពេលកាត់បន្ថយកាកសំណល់ និងគ្រោះថ្នាក់ដល់បរិស្ថាន។ ខាងក្រោមនេះជាវិធីសាស្រ្ត ដែលប្រជាកសិករអាចយកទៅអនុវត្ត ដើម្បីទទួលបានកសិកម្មប្រកបដោយចីរភាព។

1. ការកែច្នៃកសិផល៖ គឺជាដំណើរការនៃការបំប្លែងវត្ថុធាតុដើម រួមទាំងដំណាំ សាច់សត្វ ត្រី និងផ្លែឈើ ទៅជាផលិតផលសម្រេចដែលអាចរកទីផ្សារបាន។ ការលើកកម្ពស់វិស័យកសិកម្មកែច្នៃនាពេលបច្ចុប្បន្ននេះ គឺជាអាទិភាពរបស់រដ្ឋាភិបាល និងជាយុទ្ធសាស្ត្រក្នុងកែច្នៃវិស័យឧស្សាហកម្មនៅកម្ពុជា និងជំរុញការនាំចេញ។

2. កសិកម្មសរីរាង្គ៖ តម្រូវការរបស់ប្រជាជនលើអាហារដែលមានសុវត្ថិភាព និងមានផលប៉ះពាល់ទាបដល់បរិស្ថាន កំពុងកើនឡើងនៅគ្រប់ទីកន្លែង រួមទាំងតំបន់អាស៊ី និងប្រទេសកម្ពុជាផងដែរ ដែលផ្តល់ឱកាសថ្មីដល់កសិករក្នុងការផលិតអាហារសរីរាង្គ។ រាជរដ្ឋាភិបាលបានបង្កើតកម្មវិធីដើម្បីលើកទឹកចិត្តឱ្យមានការអនុវត្តកសិកម្មដែលមិនប៉ះពាល់ដល់បរិស្ថាន ដូចជាការកាត់បន្ថយការប្រើប្រាស់សារធាតុគីមីដែលបង្កគ្រោះថ្នាក់ ការកែលម្អប្រព័ន្ធគ្រប់គ្រងទឹក និងការគ្រប់គ្រងសត្វល្អិត។ ប្រជាកសិករក៏ត្រូវបានណែនាំឲ្យមានការប្រើប្រាស់ជីធម្មជាតិដូចជា លាមកគោ ប្រចៀវ មាន់ ឬការប្រើប្រាស់ជីកំប៉ុស រួមមានកំប៉ុសទឹក និងកំប៉ុសគោក ជាជាងការប្រើប្រាស់ផលិតផលជីគីមី។

3. ផ្តួចផ្តើមសហគមន៍ខ្នាតតូច៖

ក្រសួងកសិកម្មសហការជាមួយនឹងអង្គការស្បៀងអាហារនិងកសិកម្ម (FAO) បានបង្កើតនូវគម្រោងប្រព័ន្ធធានា (Participatory Guarantee Systems - PGS) ដែលមានការចូលរួមពីការអ្នកបង្វឹក កសិករ ដោយផ្តល់ជាការបណ្តុះបណ្តាលអំពី PGS នៅថ្នាក់ជាតិ។ គម្រោងនេះបានបង្កើតជាក្រុមកសិករដែលបានទទួលការបណ្តុះបណ្តាលពីគម្រោង ហើយ ភ្ជាប់ពួកគេទៅនឹងទីផ្សារសក្តានុពល អ្នកទិញ និងអ្នកប្រើប្រាស់។ ដោយមានការរៀបចំយុទ្ធនាការប្រព័ន្ធផ្សព្វផ្សាយ និងបង្កើតសម្ភារៈផ្សព្វផ្សាយដើម្បីបង្កើនការយល់ដឹងអំពី PGS និងកសិកម្មសរីរាង្គ ដែលបានកែលម្អការលក់របស់ពួកគេ ក្នុងការបង្កើនប្រាក់ចំណូល និងលើកកម្ពស់ជីវភាព។ កសិករជាច្រើនក៏ទទួលបានទំនុកចិត្តបន្ថែមទៀតពីអ្នកប្រើប្រាស់ ហើយខ្លះទៀតបានក្លាយជាអ្នកបណ្តុះបណ្តាលនៅក្នុងសហគមន៍ជនបទរបស់ពួកគេបន្តផងដែរ។

អត្ថបទនេះគំាទ្រដោយ Khmer Enterprise - សហគ្រិនខ្មែរ

សហគ្រិនខ្មែរ មានចក្ខុវិស័យក្លាយជាថ្នាលជាតិសម្រាប់ការលើកកម្ពស់គ្រប់សកម្មភាពរបស់វិស័យសហគ្រិនភាព។