ជារឿយៗតែងតែមានសំណួរពីសាធារណជនទូទៅថាតើអ្វីទៅជាសហគ្រិនភាព? នេះជា៥ ចំណុចសំខាន់ៗដែលបង្ហាញថាអ្នកជាសហគ្រិន៖

1. មានគំនិតច្នៃប្រឌិត៖ បុគ្គលមួយមានភាពជាសហគ្រិននៅពេលដែលគេមានគំនិតថ្មីៗមិនទាន់មាននៅក្នុងទីផ្សារ ឬសង្គមបច្ចុប្បន្ន ហើយគំនិតទាំងនោះអាចជួយសម្រួលដល់តម្រូវការ និងបញ្ហាមនុស្សទូទៅនៅក្នុងសង្គមថែមទៀត។ លក្ខណៈសម្បត្តិនេះខុសពីអ្នករកសុីត្រង់ថា គោលដៅសំខាន់របស់ការរកសុីគឺធ្វើយ៉ាងណាឱ្យទទួលបានប្រាក់ចំណេញដោយចាប់យកអាជីវកម្មដែលមានស្រាប់ក្នុងសង្គមរួចហើយ ដូចជាការលក់សម្លៀកបំពាក់តាមផ្សារធម្មតា ចំណែកឯសហគ្រិនវិញ ជាឧទាហរណ៍គេនឹងសង្កេតមើលថានៅទីផ្សារមិនទាន់មានការលក់សូត្រខ្មែរនោះទេ មានតែសូត្រពីប្រទេសជិតខាង ទើបគាត់ចាប់ផ្តើមបើកអាជីវកម្មលក់សូត្រខ្មែរដែលជួយលើកតម្កើងផលិតផលខ្មែរ ព្រមទាំងបង្កើតការងារដល់ពលរដ្ឋខ្មែរមួយចំនួនទៀត។

2. ហ៊ានប្រថុយប្រថាន៖ ជាសហគ្រិនគឺត្រូវហ៊ានប្រឈមមុខជាមួយបញ្ហា ឬ ហ៊ានប្រថុយបោះទុនថវិការ ឬ កម្លាំងកាយចិត្តជាមួយនឹងគំនិតដែលថ្មី ព្រោះផែនការ ឬ ផលិតផលខ្លះដែលបង្កើតឡើងលើទីផ្សារដែលមិនធ្លាប់មានពីមុនអាចប្រឈមនឹងការខាតបង់ខ្ពស់។ ម្យ៉ាងទៀតបុគ្គលមានភាពជាសហគ្រិន មិនសូវជាមានភាពភ័យខ្លាចក្នុងការបរាជ័យនោះទេ បុគ្គលទាំងនោះភាគច្រើនមានស្មារតីរឹងមាំ និងរៀនសូត្រពីកំហុស ហើយកែតម្រូវភាពបរាជ័យនោះទៅជាភាពជោគជ័យវិញ។

3. មានការសម្របខ្លួនខ្ពស់៖ ភាពជាសហគ្រិនគឺតម្រូវឱ្យមានការសម្របខ្លួន និងបត់បែនខ្ពស់ទៅតាមបរិបទ និងភាពពេញនិយមរបស់សង្គមដើម្បីអភិវឌ្ឍអាជីវកម្មឱ្យមានភាពទំនើប ទាន់សម័យ ដែលអាចទាក់ទាញអតិថិជនបាន តែនៅតែរក្សាជំហរមានអ្វីដែលថ្មីសម្រាប់សង្គមដដែល។ ឧទាហរណ៏ជាក់ស្តែងការវិវត្តនៃទូរស័ព្ទដៃ កាលពីជំនាន់មុនគឺត្រឹមតែមានទូរស័ព្ទដែលអាចត្រឹមតែទាក់ទងគ្នាធម្មតា តែដោយសារមានការពេញនិយមនូវប្រព័ន្ធអ៉ិនធឺណិត ទើបសហគ្រិនជាច្រើនបង្កើតទូរស័ព្ទទំនើបអាចលេងអ៉ិនធឺណិតបាន ហើយវិវត្តរៀងរាល់ឆ្នាំដូចជា តម្លើងគុណភាពកាមេរ៉ា គុណភាពសម្លេងឱ្យកាន់តែមានបច្ចេកវិទ្យាទំនើបទៅៗ។

4. ភាពជាអ្នកដឹកនាំ៖ ជាសហគ្រិនដែលខ្លាំងមួយរូប តែងប្រកាន់ខ្ជាប់នូវភាពជាដឹកនាំល្អ។ ជាអ្នកដឹកនាំល្អត្រូវចេះគ្រប់គ្រងក្រុមការងារ បង្កើតក្រុមមួយដែលមានឆន្ទៈ និងទស្សនៈដូចគ្នាទើបអាចសម្រេចគម្រោងនោះបានទៅមុខ និងមាននិរន្តរភាព។

5. ចេះមានការងឿងឆ្ងល់ច្រើន ចង់ចេះ ចង់ដឹង៖ ដោយសារតែបុគ្គលជាសហគ្រិនត្រូវយល់ដឹង និងតាមដានបរិបទសង្គម ដើម្បីបង្កើតអ្វីដែលថ្មីស្របតាមបញ្ហាសង្គម ពួកគេត្រូវតែមានការងឿងឆ្ងល់ជារឿយៗអំពីលទ្ធភាពជោគជ័យនៃគំនិតមួយ ឬមានឱកាសអ្វីដែលថ្មីដែលពួកគេអាចបង្កើនចំណេះដឹង និងធ្វើពិសោធលើគម្រោងអាជីវកម្មពួកគេបាន។ ឧទាហរណ៍ជាក់ស្តែងនោះគឺលោក Jeff Bezos ដែលជាស្ថាបនិក Amazon មានការងឿងឆ្ងល់ថាប្រព័ន្ធអុិនធឺណិតនេះអាចប្រើប្រាស់ដល់កម្រិតណាខ្លះ ទើបគាត់ចាប់ផ្តើមពីត្រឹមតែជាហាងសៀវភៅអនឡាញតូចមួយ រួចវិវត្តិទៅជាប្រព័ន្ធលក់ដូរទំនិញតាមអនឡាញដ៏ធំ ដែលមានទំនិញស្ទើរគ្រប់ប្រភេទ។

អត្ថបទនេះគំាទ្រដោយ Khmer Enterprise - សហគ្រិនខ្មែរ

🔰 សហគ្រិនខ្មែរ មានចក្ខុវិស័យក្លាយជាថ្នាលជាតិសម្រាប់ការលើកកម្ពស់គ្រប់សកម្មភាពរបស់វិស័យសហគ្រិនភាព។