កាលពីមុន ទីផ្សារមានលក់តែផលិតផលក្នុងស្រុកតែប៉ុណ្ណោះ ក៏ប៉ុន្តែនៅពេលដែលមានវត្តមានសកលភាវូបនីយកម្ម យើងអាចទិញនំចំណី បន្លែផ្លែឈើដែលមិនមានផលិតនៅក្នុងស្រុកបានយ៉ាងងាយស្រួលជាងមុន។ អ្វីទៅជាសកលភាវូបនីយកម្ម? សកលភាវូបនីយកម្មជាដំណើរការលំហូរនៃទំនិញ សេវាកម្ម និងមូលធនពីប្រទេសមួយ ទៅប្រទេសមួយទៀត។ ហើយវាក៏បាននាំមកនូវអត្ថប្រយោជន៍ជាច្រើនដល់គ្រប់វិស័យ ដែលក្នុងនោះយើងឃើញមានការរីកចម្រើនលើវិស័យកសិកម្មដែលមានដូចជា៖

ការចូលទៅកាន់ទីផ្សារអន្តរជាតិ៖ សកលភាវូបនីយកម្មពង្រីកឱកាសទីផ្សារ អនុញ្ញាតឱ្យប្រជាកសិករលក់ផលិតផលរបស់ពួកគាត់ទៅក្រៅប្រទេស ដែលវាជួយបង្កើនចំណូលមួយកម្រិតទៀត។

ការចែករំលែកបច្ចេកវិជ្ជា និងចំណេះដឹង៖ ប្រជាកសិករមានលទ្ធភាពទទួលបានលំហូរនៃបច្ចេកវិជ្ជា ការអនុវត្តទំនើបៗ និងចំណេះដឹងផ្នែកកសិកម្មពីជុំវិញពិភពលោក ដែលជួយបង្កើនផលិតភាព និងប្រសិទ្ធភាពបានមួយកម្រិត។

ដំណាំចម្រុះ ៖ វាជួយក្នុងការកាត់បន្ថយហានិភ័យដែលពឹងផ្អែកទៅលើដំណាំតែមួយប្រភេទ ហើយក៏អាចនាំឱ្យរបបអាហារមានតុល្យភាពជាងមុនផងដែរ ដោយសារយើងអាចទទួលបានដំណាំផ្សេងៗជាច្រើនទៀត នៅជុំវិញពិភពលោក។

បង្កើនការវិនិយោគពីក្នុងស្រុក និងក្រៅស្រុក៖ ការវិនិយោគនេះអាចនាំទៅដល់ការអភិវឌ្ឍន៍ហេដ្ឋារចនាសម្ព័ន្ធកាន់តែប្រសើរ ដូចជាប្រព័ន្ធធារាសាស្ត្រ បណ្តាញដឹកជញ្ជូន និងកន្លែងស្តុកទុកកសិផល។

ការទទួលបានព័ត៌មាន៖ កសិករអាចទទួលបានព័ត៌មានបន្ថែមអំពីទីផ្សារក្រៅស្រុក គំរូអាកាសធាតុ និងបច្ចេកទេសកសិកម្មថ្មីៗពីជុំវិញពិភពលោក។ ព័ត៌មាននេះអាចជួយពួកគេធ្វើការសម្រេចចិត្តច្បាស់លាស់អំពីពេលវេលាដាំដំណាំ របៀបគ្រប់គ្រងដំណាំ និងកាលបរិច្ឆេទប្រមូលផល។

អត្ថបទនេះគំាទ្រដោយ Khmer Enterprise - សហគ្រិនខ្មែរ

🔰សហគ្រិនខ្មែរ មានចក្ខុវិស័យក្លាយជាថ្នាលជាតិសម្រាប់ការលើកកម្ពស់គ្រប់សកម្មភាពរបស់វិស័យ

សហគ្រិនភាព។